Tokio uniwersitetiniň we Waseda uniwersitetiniň alymlary predmetleri dolandyryp, çylşyrymly hereketleri, şol sanda “gaýçy” hereketini ýerine ýetirip bilýän biogibrid eli döretdi. Hereketi we güýji döretmek üçin bu tehnologiýa ýörite ösdürilip ýetişdirilen myşsa dokuma aktuatorlaryny (MuMuTA) ulanýar.
18 sm uzynlykdaky el 3D usulynda çap edilen plastik karkasdan we barmaklara aýratynlykda ýa-da bilelikde hereket etmäge mümkinçilik berýän myşsa dokumasyndan döredilen damarlardan ybarat.
Esasy mesele şeýle uly gurluşy dolandyrmak üçin ýeterlik ýygrylma güýjüni döretmek boldy. Bu mesele biologiki myşsalaryň işine “öýkünýän” MuMuTA aktuatorlarynyň kömegi bilen çözüldi. Tehnologiýa gowy netijeleri görkezdi: el predmetleri tutup, bir ýerden başga ýere geçirip bilýär.
Ýöne biogibrid gurluşlarda myşsa dokumasynyň ulanylmagy käbir çäklendirmeleri ýüze çykarýar. 10 minut hereketden soň, robot el güýjüni ýitirýär, ýöne dynç alandan soň ýene dikelýär.
Şeýle-de, häzirki wagtda barmaklaryň akgynly hereketini üpjün etmek üçin el diňe suwuk gurşawda işleýär. Alymlar tarapyndan ýene bir çözülmeli mesele, barmaklary başlangyç ýagdaýyna getirmekdir. Häzir barmaklar öz ýüzüjiligi arkaly başlangyç ýagdaýyna gaýdyp gelýär. Indi ylmy gözlegçiler bu meseläni barmaklaryň arka tarapyna maýyşgak material ýa-da goşmaça MuMuTA elementlerini goşmak arkaly çözmäge synanyşar.
Geljekde tehnologiýa ösen protezlerde we myşsa dokumalaryny öwrenmekde ulanylyp bilner.
