«Betmeniň» baş gahrymany Robert Pattinson filmiň dowamynyň surata düşürilişiniň haçan başlajakdygyny aýtdy. Muşdaklar garaňky Gotem şäherine 2027-nji ýylda gaýdyp gelerler.
Surata düşürmek işleriniň başlajak senesi barada «Deadline» neşiriniň beren soragyna: «Biz entek başlamadyk. Ýylyň ahyrynda.» — diýip, aktýor jogap berdi.
DC we Warner Bros. studiýalarynyň filminiň ilkinji bölümi 2022-nji ýylda çykdy we dünýä boýunça prokatlarda 772 million dollar girdeji gazandy. Esasan-da Golliwuddaky iş taşlaýyşlar sebäpli, filmiň dowamynyň önümçiligi birnäçe gezek yza süýşürildi. Geçen ýyl şol döwürlerde baş keşbinde Kolin Farrell çykyş edýän «Pingwin» atly köp bölümli spin-off serial çykypdy.
«Betmen 2» filminiň režissýory ýene-de Mett Riwz bolar. Kolin Farrell, Zoi Krawis we Endi Serkis hem öz keşplerine gaýdyp gelerler.
Filmiň premýerasy 2027-nji ýylyň 1-nji oktýabryna meýilleşdirilýär.
