Disney «Garpamyk» filminiň täze tizer-treýlerini hödürledi. Film 21-nji martda kinoteatrlarda görkezilip başlanar.
Bu film 1937-nji ýylda çykan «Garpamyk we ýedi girdenek» atly klassiki multfilmiň remeýki (täzeden işlenen görnüşi) bolar. Ol doganlar Grimmleriň meşhur ertekisine esaslanýar. Filmde wakalar elbetde, gözel şa gyzy Garpamyk barada gidýär. Onuň gözelligi, gara ýürekli öweý enesi Şa zenanyň gabanjyna sebäp bolýar. Şa zenany ony ýigrenýär we oňa garşy ýamanlyk etmäge synanyşýar.
Asyl nusgasyndan tapawutlylykda, Garpamyk bu filmde has erkin we öz ykbalyny özi kesgitleýän gahryman hökmünde görkeziler.
«Biz indi 1937-nji ýylda däl. Şazada tarapyndan halas edilmäge mätäç bolmaz ýaly, Garpamygy bilkastlaýyn [şu döwre laýyk] şekillendirdik. Ol indi hakyky söýginiň arzuwynda däl-de, kakasynyň görşi ýaly hakyky baştutan bolmak isleýär: batyr, adalatly we hakykata wepaly.» ― diýip, baş keşbi ýerine ýetiren aktrisa Reýçel Zegler aýtdy.
Filmde Garpamygyň öweý enesi Şa zenanyň keşbini meşhur aktrisa Gal Gadot ýerine ýetirýär. Şazada Jonatanyň keşbinde bolsa Endrýu Bernap çykyş edýär.
Filmiň režissýory hökmünde Mark Uebb çykyş edýär. Ssenariýesini Erin Kressida Wilson we Greta Gerwig bilelikde ýazdy.
Täze «Garpamyk» filminiň ilkinji tizer-treýleri 2024-nji ýylyň awgust aýynda çykypdy we tomaşaçylaryň uly tankydyna sezewar bolupdy. Tizer-treýler laýka garanyňda «15 esse köp dizlaýk» alypdy. Ulanyjylaryň köpüsi filmde aşa köp kompýuter grafikasynyň (CGI) ulanylmagyna närazy boldular. Şeýle-de baş keşp üçin latinoamerikan aktrisanyň saýlanylmagy we Garpamygyň häsiýetine başgaça çemeleşilmegi tomaşaçylara ýaramady.
