Apple kompaniýasynyň baş müdiri Tim Kuk 13-nji fewralda X sosial torunda syrly tizer paýlaşyp, tiz wagtda boljak täze tanyşdyrylşy tassyklady diýip, «MacRumors» portaly ýazýar.
«Maşgalamyzyň täze agzasy bilen tanyşmaga taýyn boluň» diýip, Tim Kuk ýazdy. Ol 19-njy fewralda Apple-yň täze önümlerini hödürlejekdigini mälim etdi. Kukuň paýlaşan ýazgysynda kümüş reňkde şöhle saçýan Apple-yň nyşany görnüp duran gysga wideorolik hem bardy.
Çaklamalara görä, 19-njy fewralda Apple arzan bahaly täze iPhone SE modelini tanyşdyrar. Resmi bolmadyk maglumatlara görä, täze iPhone SE daşky görnüşi boýunça iPhone 14-e meňzär. Smartfon 6,06 dýuýmlyk OLED ekran bilen enjamlaşdyrylar. Ekranyň durulygy Full HD+, täzeleniş ýygylygy bolsa 60 Gz bolar. Şeýle hem öň tarapda uly kamera kesigi we Face ID tehnologiýasy ýerleşdiriler.
Syzdyrylan maglumatlar täze iPhone SE-niň diňe bir sany arka kamerasynyň boljakdygyny görkezýär. Bahasy babatda hem käbir maglumatlar bar. Gürrüňlere görä, täze iPhone SE-niň bölekleýin satuw bahasy 499 dollar bolar. Bu bolsa 2022-nji ýylda çykarylan öňki modelden 70 dollar gymmatdyr.
Apple bu tanyşdyrylyşda başga-da täze önümleri hödürläp biler. Ýakynda çykan gürrüňlere görä, M4 çipli MacBook Air, M3 prosessory bilen işleýän täze iPad Air hem-de 11-nji nesil iPad hem tanyşdyrylyp bilner.
Käbir ulanyjylar Tim Kukuň paýlaşan tizerinde täze AirPods barada yşaratyň bardygyny hem aýdýarlar. Şeýle-de bolsa, iň ähtimal täzelik 4-nji nesil iPhone SE bolmaly diýlip garaşylýar.
