Amerikaly we ýaponiýaly alymlaryň geçiren barlaglary ýogurt bilen yzygiderli iýmitlenmegiň kolorektal düwnük keseliniň döremek töwekgelçiligini azaldyp biljekdigini görkezdi. Çişiň bu görnüşi ýogyn içegäniň sag tarapynda ýüze çykýar we hassalarda ölüm derejesi göni içegäniň düwnük keseline garanda has ýokarydyr.
Ýogurt tebigy süýtden we bolgar taýajygy bilen termofil streptokokklaryň uýan görnüşinden taýýarlanýar. Bu süýt-gatyk önümi içege bakteriýalarynyň deňagramlylygyny saklamak we içege çişleriniň öňüni almak ýaly peýdaly häsiýetleri bilen köpden bäri mälimdir.
Gut Microbes žurnalynda neşir edilen bu barlagda 132 000-den gowrak adamyň (87 379 zenan we 44,677 erkek adam) gatnaşmagynda we içegäniň düwnük keseliniň 3079 ýagdaýy baradaky maglumatlar, şol sanda tassyklanan kesel kesgidi bolan gatnaşyjylaryň dokumasynyň nusgalary bilen baglanyşykly iki sany uly barlagyň maglumatlary ulanyldy. Barlagyň başynda 1976-njy ýylda zenanlaryň 30-55 ýaşy dolupdy, 1986-njy ýylda erkekler 40-75 ýaş aralygyndady.
Statistik seljermeleriň esasynda alymlar hepdede iki ýa-da ondan hem köp gezek ýogurt iýmegiň içegäniň düwnük keseliniň döremek howpuny 20% azaldýandygyny anykladylar. Täsir, esasanam, bifidobakteriýa boýunça oňyn çişlerde aýdyň göründi.
Barlagyň awtorlary ýogurt içegäniň mikrobiomasyna oňyn täsir edip biler diýip hasaplaýarlar, ýöne bu çaklamany tassyklamak üçin goşmaça işleri geçirmek zerur.
