Warner Bros. kompaniýasy geljekki “Garri Potter” serialynyň kasting işini doly tamamlady diýen ýaly. Garriniň, Ronuň we Germionanyň rollary üçin gözleg heniz dowam edýär, ýöne awtorlar Hogwartsyň müdiri we iň güýçli jadygöýleriň biri Albus Dambldoryň roluna esasy dalaşgäri tapdy diýip, Deadline neşiri habar berýär.
Žurnalistleriň maglumatlaryna görä, iň akylly jadygöý 79 ýaşly aktýor Jon Litgou bolup biler. Häzir ol serialyň awtorlary bilen soňky gepleşikleri geçirýär. Artist “Dekster” serialynda zalym Artur Mitçelliň roly bilen bellidir. Bu keşbi üçin ol “Altyn globus” we “Emmi” baýraklaryna mynasyp boldy. Litgou “Gül Aýynyň ganhorlary” (Убийцы цветочной луны) we “Konklaw” (Конклав) ýaly meşhur filmlerde-de oýnady.
Öň, Dambldoryň roluna abraýly britaniýaly aktýor we “Içaly köprüsi” filminde ikinji plandaky iň gowy keşp üçin “Oskar” baýragyny alan 65 ýaşly Mark Raýlens hem göz öňünde tutulypdy.
“Garri Potter” serialy 2027-nji ýylyň başynda birinji möwsümiň çykmagy bilen başlar. Taslamanyň şouranneri “Mirasdüşerleriň” ssenariçisi Françeska Gardiner bolar, ýazyjy Joan Rouling bolsa maslahatçy hökmünde çykyş eder.
