Çiliniň Patagoniýa kenarýakasyndaky Magellan bogazynda 24 ýaşly Adrian Simankas täsin wakanyň baş gahrymany boldy. Ol birnäçe sekuntlap äpet kitiň agzyna düşdi. Bu ajaýyp pursat wideo düşürildi diýip, «The Guardian» neşiri habar berýär.
Adrian Simankas kakasy bilen bile El-Agila aýlagynda gaýyk bilen ýüzüp ýördi. Şol wagt duýdansyz ýagdaýda äpet kit suwuň ýüzüne çykyp, ony agzyna aldy. Iki-üç sekunt geçenden soň bolsa, haýwan oňa hiç hili zyýan ýetirmezden yzyna gaýtaryp goýberdi.
Şol wagt golaýda Adrianyň kakasy hem durdy. Ol oglunyň başyna gelen bu täsin wakany wideo düşürdi. Oglunyň sag-aman halas bolanyna gözi ýetensoň, kakasy oňa «Rahatlan, Rahatlan» diýip aýdýar.
Hadysadan soň, Adrian başyndan geçiren zatlaryny «Associated Press» habar gullugyna gürrüň berdi: «Men ölendirin öýtdüm. Meni ýuwutdy diýip pikir etdim» diýip, ol şol pursatky duýgularyny paýlaşdy. Onuň aýtmagyna görä, ol äpet süýdemdirijiniň çygly boşlugynda galypdyr we ol ýerde üýtgeşik sesleri eşidipdir.
Ol birnäçe sekundyň dowamynda başdan geçiren «elhenç» duýgularyny beýan edip, hakyky gorkynyň diňe suwuň ýüzüne çykanynda başlandygyny aýdýar. Ol kitiň kakasyna zyýan ýetirerinden gorkandygyny hem-de buz ýaly suwlarda jan bermekden howatyrlanandygyny boýun alýar.
Ataly ogul sag-aman kenara çykdylar. Bu wakadan olaryň alyp galan ýeke-täk zady «gorky» boldy.
