Integrated Systems Europe (ISE) 2025 sergisinde Samsung Electronics kompaniýasy köp sanly özboluşly tehnologiýalary tanyşdyrdy. Olaryň arasynda dünýäniň iň uly reňkli elektron kagyz displeýi hem bardy. EMDX modelleriniň hataryna girýän täze enjam energiýa tygşytlaýjy aýratynlyklary hem-de ösen tehnologiýalary bilen ünsleri özüne çekdi diýip, «TechSpot» neşiri habar berýär.
Samsung-yň 75 dýuýmlyk reňkli elektron kagyz (E-Paper) displeýi statik şekilleri görkezýän wagty energiýa sarp etmeýär. Diňe mazmun üýtgedilende energiýa sarp edýär. Bu aýratynlyk ony jemgyýetçilik ýerlerindäki açyk mahabat bannerleri, maglumat stendleri we beýleki täjirçilik maksatly ulanyşlar üçin ajaýyp çözgüde öwürýär. Displeý 5K çözgüdi hem-de 16:9 in-boý ölçegini goldaýar we ýokary hilli şekilleri görkezip bilýär.
EMDX hatarynda kiçi ölçegli – 13, 25 we 32 dýuýmlyk modeller hem bar. Ähli enjamlar 5000 mAh göwrümli batareýa, zarýad bermek we maglumat geçirmek üçin iki sany USB-C port, 8 GB içerki ýat hem-de Wi-Fi we Bluetooth goldawy bilen enjamlaşdyrylandyr. Tanyşdyrylan displeýleriň önümçiliginde 50%-den gowrak gaýtadan işlenen plastmassa ulanylypdyr we olaryň gaplamalary dolulygyna kagyzdan taýýarlanypdyr. Bu kompaniýanyň ekologiýa baradaky seresaplylygyny görkezýär.
Şeýle hem Samsung bilim we işewürlik üçin niýetlenen gurallara emeli aň ornaşdyrylan 2025-nji ýyl interaktiw displeýini (WAFX-P modeli) tanyşdyrdy. Enjam Android 15 operasion ulgamynda işleýär we ekrandaky şekiller boýunça gözleg geçirmek hem-de tekstleri terjime etmek üçin niýetlenen «Circle to Search», şeýle-de leksiýalaryň ýa-da ýygnaklaryň gysgaça mazmunyny taýýarlamak üçin niýetlenen «AI Summary» ýaly funksiýalary goldaýar.
Bulardan başga-da, Samsung 115 dýuýmlyk 4K Smart Signage (QHFX modeli) displeýini hem tanyşdyrdy. Bu enjam 16:9 in-boý ölçegini, multi-view (4-e bölünen penjire) funksiýasyny we QLED 4K çözgüdi goldaýar. Enjamyň iň ýokary ýagtylygy 700 nit bolup, ol Tizen OS 8.0 operasion ulgamynda işleýär.
ISE 2025 sergisi Samsung kompaniýasy üçin energiýa tygşytlaýjy, ekologiýa taýdan amatly we innowasion tehnologiýalaryny görkezmek üçin uly mümkinçilik boldy.
