Adobe kompaniýasy tekst arkaly wideo döretmäge mümkinçilik berýän generatorynyň indi hemmeler üçin elýeterlidigini we Firefly emeli aňyna (EA) tölegli abunalygyň ýola goýlandygyny mälim etdi diýip, The Verge neşiri habar berýär.
«Generate Video» atly gural (generator), tekst görnüşli beýanlara ýa-da statik şekillere esaslanyp wideolary döretmäge mümkinçilik berýär. Generatorda dörediljek wideolaryň netijelerini üýtgetmek ýa-da ugrukdyrmak üçin ýörite opsiýalar bar: stillere öýkenmek, kameranyň ýerleşişini, hereketini we obýekte bolan uzaklygyny saýlamak mümkin. Generator ozal wideolary 720p çözgütde döredýärdi, indi bolsa wideolary sekuntda 24 kadr tizlikde 1080p çözgütde döretmäge mümkinçilik berýär. Iň uzak dowamlylygy 5 sekunt bolan wideolaryň döredilmegi üçin takmynan 90 sekunt wagt gerek.
Şeýle hem Adobe kompaniýasy Firefly web sahypasynyň generatiw EA gurallary bölümini täzeledi. Ulanyjy interfeýsi kämilleşdirildi we Photoshop, Premiere Pro hem-de Express ýaly Creative Cloud programmalaryna integrasiýalar goşuldy. Şeýlelikde döredilen materiallary birinden beýlekisine geçirmek we redaktirlemek indi has aňsatlaşdy.
Mundan başga-da «Scene to Image» atly täze funksiýanyň beta synaglaryna başlandy, bu funksiýa üç ölçegli obýektleri ýa-da çyzgy eskizlerini (garalamalary) başlangyç maglumat hökmünde ulanyp, şekil döretmäge mümkinçilik berýär. «Translate Audio and Video» atly gural bolsa, wideolardaky ýa-da audiofaýllardaky «asyl sesleri» ulanyp, 20-den gowrak dile terjime etmek mümkinçiligini hödürleýär.
Adobe Firefly platformasyny indi abunalyk arkaly ulanyp bolýar. «Firefly Standard» nyrhnamasynyň bahasy aýda 9,99 dollar bolup, ol 2000 sany «kredit» berýär – bu bolsa 1080p çözgütde 20 sany 5 sekuntlyk wideo döretmek üçin ýeterlik. «Firefly Pro» bolsa aýda 29,99 dollardan başlaýar we 7000 sany «kredit» berýär – bu bolsa 70 sany wideo döretmäge mümkinçilik berýär. Şeýle-de Firefly abunalaryna çäklendirmesiz rastr we wektor grafikalary işlemek mümkinçiligi hödürlenýär.
