Kendrik Lamar Spotify-yň taryhynda iň köp diňlenýän rep ýerine ýetirijisi boldy. Bu barada Chart Data ýazýar.
“Not Like Us” aýdymynyň awtory 88,8 milliondan gowrak aýlyk diňleýjini toplady – bu hip-hop artistleri üçin täze rekorddyr. Bu üstünlik oňa öňki rekord eýesi, kanadaly repçi Dreýkden öňe geçmäge mümkinçilik berdi. Onuň aýlyk diňleýjisi 74,5 milliona ýetýär. Platforma maglumatlary her 30 günden bir gezek täzeleýär.
Şeýle-de, Lamar bu görkeziji bilen iň köp diňleýjisi bolan sekiz artistiň hataryna goşuldy. Ol sanawda Teýlor Swiftden we SZA-dan öňe geçdi hem-de Ariana Grandeni ilkinji onlukdan çykardy. Reýtingde öňdebaryjy orny 151 million diňleýji bilen Bruno Mars eýeleýär, onuň yzyndan 124 million bilen The Weeknd we 121 million bilen Ledi Gaga gelýär.
Lamaryň muşdaklarynyň sanynyň artmagyna onuň Superboul LIX-de eden çykyşy ýardam etdi. ABŞ-nyň Milli futbol ligasynyň çempiony ady ugrundaky final oýny ekrana 133 mln tomaşaçyny çekdi. Bu görkeziji 1993-nji ýylda meşhur Maýkl Jeksonyň çykyşynda goýlan rekorddan ýokary boldy. Analitikler Lamaryň meşhurlygynyň artmagyny ýaýlymyň täsiri bilen baglanyşdyrýar: çykyşdan soň eýýäm ilkinji sagatlarda onuň aýdymlarynyň strimi 65% ýokarlandy.
