YouTube-yň baş müdiri Nil Mohan emeli aňy (EA) kompaniýanyň 2025-nji ýyl üçin esasy dört «maýa goýumynyň» biri hökmünde atlandyrdy. Ol döredijiler üçin niýetlenen EA gurallaryna maýa goýýandyklaryny belläp geçdi. Bu gurallar ideýa döretmek, miniatýura taýýarlamak we wideolary dürli dillere terjime etmek üçin ulanylar diýip, «TechCrunch» neşiri habar berýär.
Mohan şu aýyň dowamynda YouTube-yň hyzmatdaşlyk maksatnamasyna degişli ähli döredijiler üçin awtomatiki dublýaž funksiýasynyň elýeterli boljakdygyny habar berdi. Bu gural wideony şol bir wagtyň özünde birnäçe dile terjime etmek arkaly tomaşaçylaryň sanyny ep-esli artdyrmaga ýardam berer.
YouTube EA-ny diňe bir terjime üçin däl-de, eýsem EA-nyň ulanylşyna gözegçilik etmek üçin hem ulanmagy meýilleşdirýär. Ilkinji nobatda Creative Artists Agency (CAA) bilen hyzmatdaşlyk giňeldiler. Bu çäre sungat işgärlerini, şol sanda suratkeşleri, artistleri, sazandalary we türgenleri, olaryň keşbiniň ýa-da sesiniň EA arkaly göçürilmeginden goramak üçin alnyp barylýar.
Şeýle-de Mohan şu ýylyň dowamynda platformanyň ulanyjylarynyň ýaşyny kesgitlemek üçin maşyn öwreniş (machine learning) tehnologiýasyndan peýdalanjakdygyny aýtdy. Maksat – her adama öz ýaşyna görä wideolar görkezmek. Emma täze tehnologiýanyň ulanyjylaryň ýaşyny nädip kesgitlejekdigi barada jikme-jik maglumat bermedi. Şeýle hem ýüze çykyp biljek ýalňyşlyklar baradaky soraglara jogap bermekden saklandy.
YouTube 2025-nji ýyl üçin öz öňünde başga-da birnäçe uly maksatlary goýýar:
- TikTok tarapyndan alnan medeni liderligi gaýtadan ele almak;
- Özüni «täze Golliwud» hökmünde pozisiýalaşdyrmak;
- YouTube-yň esasy ünsüni uly ekrana gönükdirmek, sebäbi häzirki wagtda platformany telewizorda görmek mobil enjamlara garanyňda has meşhur bolup başlady.
