Clash of Clans, Clash Royale we Brawl Stars oýunlarynyň işläp düzüjisi bolan Tencent Holdings Ltd. kompaniýasyna degişli fin oýun studiýasy Supercell 2024-nji ýylyň jemleri boýunça maliýe ugrundaky üstünligini mälim etdi diýip, Bloomberg neşiri habar berýär.
Maglumatlara görä, Supercell-iň 2024-nji ýyldaky girdejisi rekord derejä – 3 milliard dollara ýetdi. Bu görkeziji 2023-nji ýyl bilen deňeşdirilende 77% köpdür. Göterimlerden, salgytlardan we amortizasiýadan öňki peýda 78% artyp 947 million dollara ýetdi.
Supercell-iň esaslandyryjysy we baş müdiri Ilkki Paananeniň sözlerine görä, kompaniýanyň ähli oýunlary we hyzmatlary 2024-nji ýylda ösüş görkezdi. «Bu soňky on ýyldan bäri ilkinji gezek bolup dur» diýip, ol belläp geçdi.
Bloomberg neşiri mobil oýun bazarynyň kyn döwürlerden geçýändigine garamazdan, Supercell-iň gazanan üstünliginiň aýratyn üns berilmäge degişlidigini ýazýar.
Sensor Tower-iň maglumatlaryna görä, 2024-nji ýylda mobil oýunlaryň IAP (In-App Purchases) boýunça umumy girdejisi 80,9 milliard dollara ýetdi, emma 2021-nji ýylyň rekordlaryny geçip bilmedi.
2024-nji ýylda Supercell Squad Busters atly täze mobil oýnuny çykardy. Ilkinji ýedi aýyň dowamynda täze oýun 100 million dollardan gowrak girdeji gazandy.
Oýun pudagynda köpçülikleýin işden çykarmalaryň dowam edýän mahaly, Supercell-iň işgärleriniň sany 2023-nji ýyldan bäri 31% artdy we 686 adama ýetdi. Paananen, oýunçylaryň köpdürlüligi üçin zehinli işgärleri işe almagyň we kämilleşdirmegiň möhümdigini nygtady.
