Beýik Britaniýanyň Kurto sungat institutynyň alymlary Pablo Pikassonyň suratynyň astynda gizlenen aýalyň keşbini tapdylar. Açyş infragyzyl we rentgen şöhleleriniň kömegi bilen ýüze çykaryldy diýip, CNN habar berýär.
Çaklamalara görä, 1901-nji ýylda Pikasso ilki bilen bir aýalyň keşbini çekipdir, emma birnäçe aýdan soň onuň üstünden öz dostuny, heýkeltaraş Mateu Fernandes de Sotony şekillendiripdir.
Kurto galareýasynyň müdiriniň orunbasary Barnabi Raýt aýalyň keşbiniň «gözleriniň alnynda peýda bolandygyny» aýtdy.
Suratyň astyndaky aýalyň şahsyýetini häzirlikçe anyklap bolmady. Sungat taryhçylarynyň pikirine görä, ol Pikassonyň 1901-nji ýylda Parižde şekillendiren birnäçe modeline meňzeýär. Raýtyň sözlerine görä, ol tötänleýin saýlanan model ýa suratkeşiň söýgülisi ýa-da onuň dosty bolup biler.
Geçirilen rentgen barlaglary Pikassonyň şol bir brezentiň (ak keten matanyň) üstüne üç-dört gezek surat çekendigini görkezýär. Munuň sebäbi, onuň täze material satyn almaga pulunyň bolmandygy ýa-da onuň bir keşbi başga biriniň keşbine öwürmegi halaýandygy bilen baglanyşdyrylýar.
