Valve kompaniýasy oýunlary işläp düzüjiler üçin kadalaryny täzeledi we Steam platformasynda oýunlaryň içindäki tölegli mahabatlary doly gadagan etdi. Indi oýunlaryň dowam etmegi üçin mahabatlary görmek talap edilip bilinmez, şeýle hem işläp düzüjiler mundan beýläk oýunlaryny neşir etjek bolsalar, şular ýaly elementleri aýyrmaly bolarlar diýip, «Eurogamer» neşiri habar berýär.
Steamworks resminamalaryna «Steam-de mahabatlar» (Advertising on Steam) atly täze sahypa goşuldy. Bu sahypada mahabatlaryň haýsy görnüşlerine rugsat berilýändigi we haýsylarynyň gadagan edilýändigi barada jikme-jik maglumatlar ýerleşdirilen.
Täze düzgünlere görä, şular gadagan edilýär:
- Tölegli mahabatlary işewürlik modeli hökmünde ulanmak, ýagny oýnuň dowam etmegi üçin mahabatyň görülmegini talap etmek ýa-da oýnuň prosesini mahabatlar bilen böwetlemek. Eger-de bir oýun beýleki platformalarda mahabatdan girdeji gazanmak üçin döredilen bolsa, Steam-de neşir edilmezden ozal şol elementler aýrylmaly. Alternatiw çözgüt hökmünde bir gezek satyn almak modeli ýa-da şertli mugt model (mikro tölegler we DLC bilen) hödürlenýär.
- Mahabatlary oýunçylara bonus ýa-da baýrak bermek üçin ulanmak.
- Beýleki işläp düzüjilerden Steam funksiýalaryna (arzanladyş sahypalaryna, toplumlara, dükan sahypalaryna ýa-da franşizalara) girmek üçin töleg talap etmek.
Mundan ozal şeýle gadaganlyklar, kriptowalýutalar we NFT-ler üçin niýetlenen blokçeýn tehnologiýasyndan peýdalanýan oýunlar üçin 2021-nji ýylda güýje girizilipdi.
Soňky ýyllarda Valve kompaniýasynyň ulanyjylaryň bähbitlerini goramak üçin birnäçe başlangyçlary durmuşa geçirendigini aýratyn bellemek gerek.
