Madridiň “Realy” UEFA-nyň Çempionlar ligasynyň pleý-off tapgyrynyň “Mançester Siti” bilen oýnunda ýeňiş gazandy. Klub angliýaly garşydaşyny 3:2 hasabynda utup, taryhda esasy Ýewrokubok ýaryşynyň rekordyny goýdy diýip, UEFA-nyň resmi saýty habar berýär.
Şeýlelikde, “Patyşalyk kluby” Çempionlar ligasynyň we Ýewropa çempionlarynyň kubogynyň taryhynda ilkinji bolup 300 ýeňiş gazandy. Mundan öň şeýle görkezijä ýetmek hiç bir topara başartmandy. Ýeňiş sany boýunça ikinji orunda Mýunheniň “Bawariýasy” ýerleşýär, onuň hasabynda 241 ýeňiş bar. Bu görkeziji boýunça üçlügi Kataloniýanyň “Barselonasy” (209) jemleýär.
UEFA-nyň Çempionlar ligasynyň pleý-off tapgyrynyň jogap oýny 19-njy fewralda geçiriler. Toparlar Madriddäki “Santýago Bernabeu” stadionynda duşuşar.
