NASA Artemis II missiýasynyň bat alşyndan başlap, Ýere dolanyp, suwa gonuşyna çenli esasy tapgyrlaryny görkezýän jikme-jik animasiýasyny çykardy. Space Launch System (SLS) raketasynda pilotirlenýän Orion kosmos gämisini 2026-njy ýylyň başynda uçurmak meýilleşdirilýär diýip, Digital Orre habar berýär.
Dört astronawtdan ybarat bolan ekipaž Aýyň daşyndan, onuň üstünden takmynan, 7400 kilometre çenli belentlikden aýlanyp çykar. Ekipažyň düzümine NASA-nyň astronawtlary Kristina Hammok Koh, Rid Uaýzman, Wiktor Glower, şeýle hem Kanadanyň kosmos gullugynyň astronawty Jeremi Hansen girýär. Olar 50 ýyldan gowrak wagtdan soň, Aýyň arka tarapyny görjek ilkinji adamlar bolar.
NASA-nyň görkezen wideosynda: "Bu döwürde uçuşy dolandyryş merkezi bilen kosmos gämisiniň arasyndaky aragatnaşygyň ýitmegine garaşylýar. Ekipaž Aýyň arka tarapyndan gaýdyp gelýärkä, Orion yzyna erkin gaýdyş traýektoriýasy boýunça Ýeriň dartyş güýji bilen dolanar we dört günlük tygşytly ýoly üpjün eder" - diýilýär.
Bu missiýa, takmynan, 10 gün dowam eder we 2027-nji ýylda meýilleşdirilýän Artemis III-iň Aýa gonmazyndan öňki taýýarlyk tapgyry bolar.
Aýyň daşyna aýlanyp çykandan soň, Orion erkin traýektoriýa boýunça Ýere gaýdyp geler. Suwa gonmazdan öňürti, atmosferada gämini aşa ýokary temperaturadan gorajak ýylylyk galkany işjeňleşdiriler. Soňra paraşýutlar açylar.
Soň bolsa ekipaž kapsuladan çykarylyp alnar, lukmançylyk barlagyndan geçer we taryh okuw kitaplaryna girer.
