Christie's auksion öýi emeli aň ulanyp döredilen sungat eserleriniň auksionyny yglan etdi. “Üsti ýetirilen aň” diýlip atlandyrylýan bu çäre diňe nerw ulgamlary tarapyndan döredilen eserlere bagyşlanan ilkinji çäre bolar diýip, TechCrunch habar berýär.
Auksion 20-nji fewralda Nýu-Ýorkuň Rokfeller merkezinde geçiriler. Onda Spawning AI emeli aň başlangyjynyň esaslandyryjysy Met Draýherst ýaly suratkeşleriň eserleri görkeziler. Geçiriljek sergide esasy üns merkezi surat çekýän robotda jemlener.
Şeýle-de bolsa, geçiriljek çäre suratkeşleriň arasynda ýiti tankydy seslenmäni döretdi. Olar generatiw AI-niň köp gurallaryna, suratkeşleriň rugsady alynmazdan, olaryň işleri esasynda tälim berilýändigini aýdýarlar.
Aýratynam, işleri rugsatsyz ulanylan suratçy Tim Flah bilen bagly ýagdaý muňa aýdyň mysal bolup biler. 1800-den gowrak adam auksionyň ýatyrylmagyny talap edýän açyk hata gol çekip, eserleriň ygtyýarsyz ulanylmagy olaryň eklenç çeşmesine howp salýandygyny belledi. Bu pikiri Radiohead toparyndan Tom Ýork we aktrisa Julianna Mur ýaly köp tanymal adamlar goldady.
Auksion öýi eserleriň köpüsiniň awtorlaryň razyçylygy bilen ulanylandygyny öňe sürýär. Şeýle-de bolsa, AI arkaly döredilen sungat eserleriniň etiki we kanuny netijeleri, esasanam, asyl suratkeşleriň razyçylygynyň we olara adalatly öwezini doluş tölegleriniň zerurlygy baradaky jedeller dowam edýär.
