Samsung ultra inçe dizaýnly Galaxy S25 Edge flagman smartfonyny çykarmaga taýynlanýar. Onuň korpusynyň galyňlygy 5,84 mm bolar. Emma bu dizaýna ýetmek üçin kompaniýa kameralar we batareýanyň kuwwaty babatda eglişik eder diýip, Overclockers habar berýär.
Günorta Koreýanyň tehnologiýa ägirdi soňky dizaýna geçmezden ozal, iki prototip döretdi. Beýleki prototipiň galyňlygy 6,4 mm bolup, surata düşmek üçin has köp mümkinçiligi berýän üç kamerany öz içine alýardy. Emma ýarym millimetr inçe bolan iň soňky wersiýa üçin ony iki kamera bilen çäklendirmek kararyna geldiler. Olardan biri Galaxy S25 Ultra-da gurnalýana meňzeş 200 megapikselli datçik alar.
Has inçe dizaýny saýlamak, başga-da birnäçe çäklendirmeler bilen gelýär. Batareýanyň kuwwaty bary-ýogy 3900 mAh bolar, zarýad beriş tizligi 25 Wt-dan geçmez. Galyňlygynyň peselmegi Snapdragon 8 Elite prosessorynyň gyzmagyna sebäp bolup biljek doly hukukly sowadyş ulgamynyň ýerleşdirilmegine mümkinçilik bermeýär. Geekbench 6 synaglarynyň netijelerine görä, enjam garaşylyşyndan has pes öndürijilik görkezdi.
Galaxy S25 Edge 2025-nji ýylyň aprelinde çykar diýlip garaşylýar. Bu smartfon iPhone 17 Air bilen bäsleşer. Bu smartfonlaryň bazarda peýda bolmagy saýlanan dizaýnyň ynamy näderejede ödändigini we ulanyjylaryň haýsy ylalaşyklary kabul etmäge taýýardygyny kesgitlemäge mümkinçilik berer.
