Google kompaniýasynyň reCAPTCHA ulgamy ilkibaşda web sahypalaryny awtomatlaşdyrylan hüjümlerden goramak üçin niýetlenipdi. Emma häzir ol öňki netijeliligini ýitirip, baş maksadyny ýerine ýetirip bilenok. Sebäbi emeli aň algoritmleri bu ulgamy aňsatlyk bilen aýlanyp geçip bilýär. Şeýle-de bolsa Google ony henizem «maglumat ýygnamak» üçin işjeň ulanmaga dowam edýär.
Ulgam ulanyjynyň giren web sahypalaryndan we kursorynyň hereketlerinden başlap, ulanylýan enjamyň aýratynlyklaryna çenli ähli parametrleri hasaba alýar. Geçirilen barlaglara görä bu parametrler, ýagny maglumatlar arkaly ulanyjylaryň jikme-jik «sanly yzlary» döredilýär. Bu sanly yzlar bolsa mahabat we analitika üçin peýdalanylýar.
Kaliforniýa uniwersitetiniň (Irwaýn şäherindäki) hünärmenleri tarapyndan geçirilen barlagda, reCAPTCHA-nyň web sahypalar bilen ulanyjylaryň arasyndaky täsirleşmäni haýalladýandygy ýüze çykaryldy. Üç müň alty ýüz sany adamyň gatnaşmagynda geçirilen synagda, wizual meseleleri çözmegiň adaty «Men robot däl» (Я не робот) diýen gutyjygy çözmäge garanyňda 557% köp wagt talap edýändigi anyklanyldy.
Bu mesele aýratyn-da tiz girmeli, işlemeli, görmeli, neşir etmeli we ş.m. ýagdaýlarda ulanyjylara kynçylyk döredýär. Ulanyjylaryň reCAPTCHA barlaglaryndan geçmek üçin sarp eden umumy wagty 819 million sagada deň, munuň ykdysady taýdan gymmaty bolsa 6,1 milliard dollara barabar. Şol bir wagtyň özünde bu ulgam arkaly ýygnalan maglumatlaryň gymmaty 888 milliard dollar diýlip bahalandyrylýar, bu bolsa ony täjirçilik analitikasy üçin iň möhüm gurallaryň birine öwürýär.
Netijeliligiň peselendigine garamazdan, reCAPTCHA-dan ýüz öwürmek mümkin däl: ol banklar, internet dükanlary we sosial torlar üçin hökmany bolup galýar, Google bolsa bu ulgamyň üsti bilen maglumat ýygnamaga dowam edýär.
