Adobe kompaniýasy her ýylky Max konferensiýasynda Creative Cloud programmalary — Photoshop, Premiere Pro we Lightroom üçin täze emeli aň gurallaryny tanyşdyrdy. Bu täzeleme suratlary we wideolary redaktirlemegiň çylşyrymly basgançaklaryny ýönekeýleşdirmäge we awtomatlaşdyrmaga gönükdirilendir.
Photoshop-da indi diňe Adobe Firefly modelini däl, eýsem, Google-nyň Gemini 2.5 Flash we Black Forest Labs-yň Flux.1 Kontext modelleri ýaly beýleki emeli aň ulgamlaryny hem ulanmaga bolýar. Ulanyjy surat saýlap, meselem, obýekti goşmak ýa-da çalşyrmak üçin tekst soragyny girizenden soň, dürli netijeleri görmek üçin modelleriň arasynda geçip biler.
Web görnüşindäki Photoshop programmasynda häzirki wagtda chat-bot görnüşindäki emeli aň kömekçisi synagdan geçirilýär. Oňa “doýgunlylygy artdyr” ýaly buýruklary bermek bolýar — programma bu işi awtomat ýagdaýda ýerine ýetirýär. Şonuň ýaly funksiýa Adobe Express programmasyna hem goşular.
Lightroom programmasynda bolsa “akylly saýlama” (Assisted Culling) diýen täze funksiýa synag edilýär. Ol uly surat toplumlaryny analiz edýär, olaryň kesginligini, rakursyny we fokusyny bahalap, iň gowy kadrlary hödürleýär.
Firefly hem täzelenme aldy. Täze Firefly Image 5 wersiýasy goşmaça ulaltma zerurlygy bolmazdan 4 megapiksel giňelmeli suratlary döredip bilýär. Şeýle hem ol aýratyn-da adamlary döredende has tebigy jikme-jiklikleri görkezýär.
Premiere Pro programmasyna bolsa täze “Emeli aň obýekt maskasy” (AI Object Mask) diýen gural goşuldy, ol eýýäm açyk beta görnüşinde elýeterli. Bu funksiýa kadrlaryň içindäki adamlary we zatlary awtomat ýagdaýda tanap, olary aýratynlaşdyrýar. Şeýdip, reňk sazlamalaryny, fon bulanmagy ýa-da hereket edýän obýektlere wizual effektler goşmagy has aňsatlaşdyrýar — indi el bilen takyk saýlamak zerur däldir.
Adobe-niň iň möhüm täze taslamalarynyň biri bolsa Project Moonlight ulgamydyr — bu Photoshop, Premiere Pro we Lightroom programmalarynyň mümkinçiliklerini birleşdirýän merkezi emeli aň kömekçisi. Ol mazmun döretmek we sosial ulgamlardaky kanallary dolandyrmak üçin niýetlenendir.
Ulgam ulanyjynyň stilini we neşir edýän materiallaryny analiz edýär, soňra onuň stiline laýyklykda şahsylaşdyrylan suratlary, wideolary we tekstleri döredýär. Project Moonlight ulgamy Creative Cloud kitaphanalaryna we sosial ulgamlara birikmek arkaly ulanyjynyň wizual isleglerini seljerýär, şeýle hem kanal ösüşi boýunça teklipler berýär we sosial mediada çykyş strategiýasyny düzmäge kömek edýär.
Bu taslamanyň ýapyk beta-wersiýasy ýakyn aýlarda hasaba alnan gatnaşýjylar üçin elýeterli bolar.
