Toyota kompaniýasy 147 müň sany awtoulagy öz içine alýan iki tapgyr yzyna çagyryş çäresini yglan etdi. Bu çärelere kompaniýanyň «Camry», «Lexus RX» we «Lexus NX» modelleri hem-de «Tacoma» kysymly pikaplary degişlidir diýip, «NTD News» neşiri habar berýär.
Birinji yzyna çagyryş çäresi arkadaky howpsuzlyk kemeriniň näsazlygy bilen baglanşyklydyr. Ulag öndürilende bu kemere zeper ýetirlipdir. Şol sebäpden heläkçilik bolan ýagdaýynda, ulagyň ýolagçylary goramak ukybynyň pese gaçyp biljekdigi anyklanyldy.
Ikinji yzyna çagyryş çäresi bolsa 106 müň sany «Toyota Tacoma» kysymly pikaplara degişlidir. Bu ulaglaryň käbir modellerinde tekerleriň arkasynda hapa we palçyk toplanýar. Netijede, tormoz geçirijileri könelýär. Bu mesele esasan 17 dýuýmlyk teker diskleri bolan modellerde ýüze çykýar.
Toyota kompaniýasy bu ulaglaryň eýelerine 2025-nji ýylyň aprel aýynda habarnama iberip başlar. Ähli abatlaýyş işleri resmi dilerlerde mugt ýerine ýetiriler. Ulaglaryň eýeleri öz awtoulaglarynyň ýagdaýyny NHTSA-nyň web sahypasyna VIN belgisini girizmek arkaly görüp bilerler.
