Hindistanyň kosmos gözlegleri guramasy (ISRO) 2027-nji ýylda «Çandraýan-4» missiýasyna başlamagy meýilleşdirýändigini mälim etdi. Bu missiýa ýurduň kosmos maksatnamasy üçin möhüm ähmiýete eýedir. Missiýanyň esasy maksady – Aýyň topragyndan nusga almak we ony Ýere getirmek diýip, Hindistanyň ylym we tehnologiýa ministri Jitendra Singh mälim etdi. Bu barada «Mint» neşiri habar berýär.
Missiýanyň üstünlikli amala aşyrylmagy üçin azyndan iki sany agyr ýük göteriji LVM-3 raketasy uçurylar. Bu raketalar missiýanyň bäş sany esasy bölegini orbita çykarar. Bu bölekler orbitada birleşdirilip, Aýa ugradylar. Hindistan üçin bu Aýdan nusga getirmegi maksat edinýän ilkinji missiýa bolar.
«Çandraýan-4» bilen bir hatarda, ISRO-nyň başga-da birnäçe möhüm taslamalary bar. Indiki ýyl «Gaganýan» missiýasy bilen hindistanly astronawtlar ilkinji gezek Ýeriň pes orbitasyna iberiler we yzyna getiriler. Mundan başga-da, şu ýylyň ahyrynda «Wýommitra» atly adam görnüşli robotyň gatnaşmagynda ilkinji pilotsyz synag missiýasy geçiriler.
Hindistan 2026-njy ýylda ýene bir täzelikçi taslama – «Samudraýan» missiýasyna girişer. Üç sany alym ýörite döredilen enjam bilen 6 müň metr çuňluga düşer. Missiýanyň maksady – deňziň düýbüni öwrenmek, gymmatly mineral baýlyklary, seýrek metallary hem-de öwrenilmedik deňiz jandarlaryny ýüze çykarmakdyr.
Hindistanyň kosmos pudagy soňky on ýylda uly ösüş gazandy. Infrastrukturasy gowulaşdy, hususy pudagyň gatnaşygy artdy. Häzirki wagtda ýurduň kosmos ykdysadyýeti 8 milliard dollara barabar we geljekki on ýylda bu görkezijiniň 44 milliard dollara çenli ösmegine garaşylýar.
