Meşhur ussat Antonio Stradiwari tarapyndan 1714-nji ýylda ýasalan skripka Nýu-Ýorkdaky Sotheby’s auksionynda 11,25 mln dollara satyldy diýip, The New York Times habar berýär.
Ahyrynda “Ioahim-Ma” adyny alan gural ussat tarapyndan kerkaw agajyndan ýasaldy. Ol skripkanyň korpusynda latyn dilinde şeýle ýazgy galdyrdy: «Antonius Stradivarius Cremonenfis Faciebat 1714» (Antonio Stradiwari Kremonskiý 1714-nji ýylda ýasady).
Görkezilen döwre çenli Stradiwari öz stilini timarlap, ussatlygynyň ýokary derejesine ýetipdir diýlip hasaplanylýar. Bütin dünýäde Stradiwari tarapyndan ýasalan 650 töweregi gural bar, ýöne hut bu döwrüň skripkasy hil etalony hasaplanylýar we sazandalar hem kolleksionerler tarapyndan ýokary baha eýe bolýar.
Skripkanyň baý taryhy bar. XIX asyrda ol kompozitor Iogannes Bramsyň dosty, abraýly awstriýa-wengriýaly sazanda-wirtuoz Iozef Ioahime degişlidi. Ioahim skripkany 1849-njy ýyldan 1885-nji ýyla çenli elinde saklady.
Onuň owazyndan ylham alyp, Brams meşhur re mažor orkestrli skripka üçin Konsertini ýazdy.
1967-nji ýylda guraly skripkaçy we pedagog Si-Hon Ma satyn aldy we ony 2009-njy ýylda aradan çykýança çaldy.
2013-2015-nji ýyllarda skripka Stradiwariniň dogduk şäheri bolan italýan Kremonasyndaky skripka muzeýinde saklandy. 2015-nji ýylda Bostondaky Täze Angliýanyň Konserwatoriýasynyň kolleksiýasyna berildi, ol ýerden hem auksiona çykaryldy.
