iPhone 7 we iPhone 7 Plus smartfonlary 2016-2017-nji ýyllarda uly meşhurlyga eýe bolupdy. Şol wagtlar käbir enjamlarda «Loop Disease» diýlip atlandyrylýan ses meselesi ýüze çykýardy. Şol sebäpden käbir iPhone eýeleri birnäçe ýyl mundan ozal Apple kompaniýasyna garşy toparlaýyn kazyýet işini gozgapdylar. Geçen ýyl kompaniýa bu talaplary kanagatlandyrmaga razy bolupdy. Indi bolsa şol dawa boýunça ulanyjylara öwez tölegleriniň berlip başlanandygy mälim boldy diýip, 9to5Mac habar berýär.
Berilýän maglumatlara görä, iPhone 7 we iPhone 7 Plus-yň ses meselesi ses çibiniň näsazlygy sebäpli ýüze çykýardy. Netijede, sesiň hili pese gaçýardy, şol sanda FaceTime arkaly jaň edilende we beýleki programmalar bilen işleşilende kynçylyklar döreýärdi.
Maglumat çeşmelerine görä, toparlaýyn kazyýet işine goşulan iPhone eýelerine takmynan 200 dollar möçberde öwez tölegleri berilýär. Öz iPhone-yny bejertmek üçin çykdajy eden ulanyjylar bolsa 350 dollara çenli pul alyp bilýärler.
Toparlaýyn kazyýet işine goşulmagyň möhleti geçen tomusda gutardy, şonuň üçin ähli näsaz iPhone eýeleri öwez töleglerini alyp bilmezler. Işiň täsin tarapy, Apple düzgün bozmalara ýol berendigini hiç hili boýun almaýar we aýyplamalary ret edýär. Ýöne muňa garamazdan kompaniýa şikaýatçylar bilen ylalaşyk gazanyp, öwez töleglerini töleýär.
