Buenos-Aýresde (Argentinada) La-Plata derýasyna guýýan Sarandi kanaly golaýdaky kärhananyň boýag syzdyrmagy netijesinde gyzyl reňke boýaldy. Bu barada The Guardian neşiri habar berýär.
Argentinanyň paýtagtynyň 9,6 km günortasynda ýerleşýän Awelýaneda şäheriniň içinden geçýän bu kanal, senagat zyňyndylarynyň hapalaryndan şikaýat edýän ýerli ýaşaýjylary alada goýdy.
«La Verdad» atly ýerli gazetiň ýazmagyna görä, kanalyň suwundan «ýigrendiriji» ýakymsyz ys çykýar. Ýerli ýaşaýjylar bu ýagdaý üçin kanalyň golaýynda ýerleşýän derini gaýtadan işleýän zawody günäkärleýärler.
Ýerli ýaşaýjylara görä bu waka ilkinji gezek ýüze çykanok.
«Biz üstünde nebit ýaly ýag tegmilleri bolan gök, ýaşyl, gülgüne we benewşe reňkli suwlary öň hem görüp gelýäris. Sarandi kanalynyň näderejede hapalanandygyny görmek üçin inspektor bolmagyň zerurlygy ýok» diýip, Mariýa Dukomls atly ýaşaýjy öz pikirini beýan etdi.
Häkimiýet suwuň düzümini derňemek we onuň reňkiniň üýtgemegine nähili maddanyň sebäp bolandygyny anyklamak üçin bu sebite ýörite göçme laboratoriýa iberdi. Çaklamalara görä, bu ýagdaý organiki boýagyň suwa dökülmegi sebäpli ýüze çykan bolmaly.
