2025-nji ýylyň ýanwar aýynda Ýeriň üstünde howanyň ortaça temperaturasy 13,23°C boldy, bu bolsa meteorologiýa gözegçiliginiň taryhynda iň ýokary görkezijidir. Bu barada Ýewropanyň uzak aralykdan zond bilen barlamak we kartografirleme gullugy Copernicus-a salgylanyp, TASS habar berýär.
“2025-nji ýylyň ýanwary planeta üçin iň ýyly ýanwar boldy, Ýeriň üstünde ortaça temperatura Selsiý boýunça 13,23 gradus boldy we bu 1991-2020-nji ýyllardaky ortaçadan 0,79 gradus ýokarydyr” – diýlip, gullugyň hasabatynda aýdylýar.
Senagatlaşmadan öňki dereje bilen deňeşdirilende, howanyň temperaturasy 1,75 gradus ýokary boldy. Bu eýýäm bir ýarym ýyldan gowrak wagt bäri ortaça görkezijileriň Pariž şertnamasynyň maksatly çäginden geçýändigini aňladýar. Alymlar munuň bolup biljek ýaramaz netijeleri barada duýdurýar.
Copernicus tarapyndan hödürlenen ýylylyk kartasynda ýyly ýanwar, esasan, Gündogar Ýewropada, Günbatar Sibirde, Alýaskada we Kanadanyň demirgazyk-gündogar sebitlerinde hasaba alyndy. Şol bir wagtyň özünde, ABŞ-da, Beýik Britaniýada, demirgazyk-günbatar Fransiýada we Kamçatkada adatdakysyndan sowuk boldy.
