Sony kompaniýasy «Creators Cloud» atly bulut platformasyny täzeledi we kameralaryň käbir modellerinde suratlary gönümel «Google Drive» ýa-da «Adobe Lightroom» bulut hyzmatlaryna awtomatiki geçirmek mümkinçiligini hödürledi diýip, The Verge neşiri habar berýär.
Bu täzelik media faýllaryny işlemek üçin kompýuter ýa-da smartfon ýaly goşmaça «köprüleriň» zerurlygyny aradan aýyrar, bu bolsa suratçylaryň işini ep-esli ýeňilleşdirer.
Täze funksiýa Sony kompaniýasynyň iň soňky kameralarynda elýeterli bolar. Olaryň hataryna FX3, FX30, A1, ZV-E10 II we A9 III hem degişlidir. Bu enjamlar Wi-Fi arkaly ýa-da Android, iOS we iPadOS ulgamlary üçin elýeterli «Creators App» programmasy arkaly, bulut hyzmatlarynda suratlaryň nusgasyny döretmäge mümkinçilik berýär. Ilki bilen suratlar Sony-nyň bulut hyzmatyna ýüklenýär, soň bolsa Google Drive ýa-da Lightroom-a geçirilýär.
«Creators Cloud» ulanyjylarynyň hemmesine 5 GB ýat mugt berilýär, eger-de bu hyzmat Sony kameralaryň üsti bilen ulanylýan bolsa, onda bu göwrüm 25 GB-a çenli artýar. Mundan başga-da, 100 GB ýat üçin aýda 5 dollar ýa-da ýylda 60 dollar, 500 GB üçin bolsa aýda 10 dollar ýa-da ýylda 120 dollar bolan premium tarifler hem bar.
Bilermenleriň pikirine görä, bu täze mümkinçilik Sony-nyň bazardaky bäsdeşlige ukyplylygyny ýokarlandyrmaga kömek eder, sebäbi beýleki öndürijiler hem eýýämden şuňa meňzeş funksiýalary ornaşdyryp gelýärler.
