1714-nji ýylda Antonio Stradiwari tarapyndan ýasalan we «Joachim-Ma Stradivarius» diýlip tanalýan skripka Nýu-Ýorkda auksiona çykarylar. Onuň başlangyç bahasy 12-18 million dollar aralygynda bolar diýlip çaklanylýar. Bu skripka auksionda satylan iň gymmat saz guraly bolup biler diýip, Associated Press habar berýär.
«Sotheby’s Americas» kompaniýasynyň prezidenti Mari-Klaudiýa Himenes bu skripkany XVIII asyryň «iň gowy skripkasy» hökmünde häsiýetlendirdi. Onuň sözlerine görä, bu saz guraly Stradiwariniň iň kämil döwründe ýasalypdyr we häzirki wagta çenli ajaýyp ýagdaýda saklanyp galypdyr.
Bu skripka iki meşhur eýesiniň adyny göterýär: Ýozef Ioahim we Si-Hon Ma. Wengriýaly skripkaçy Ioahim ony 1879-njy ýylda öz konsertleriniň biriniň premýerasynda ulanypdyr. Şeýle hem, bu skripka kompozitor Iogannes Bramsy öz «Re major skripka we orkestr konsertini» döretmäge ruhlandyrypdyr.
Si-Hon Ma bu skripkany 1969-njy ýylda satyn alypdyr. Ol aradan çykansoň, saz guraly Täze Angliýa Konserwatoriýasyna (NEC) sowgat berlipdir.
Bu auksiondan alynjak ähli serişdeler talyplara stipendiýa hökmünde berler.
Mundan ozal, auksionda satylan iň gymmat saz guraly Stradiwariniň başga bir skripkasy bolan «Lady Blunt» bolupdy. Ol 2011-nji ýylda 15,9 million dollara satylypdy.
