Opera kompaniýasy günüň dowamynda stresden gaça durmaga we ünsüňizi jemlemäge ýardam berýän Opera Air atly brauzerini hödürledi. Ol ýönekeý dizaýny we ruhy rahatlyk üçin niýetlenen aýratynlyklary bilen tapawutlanýar diýip, TechCrunch belleýär.
Brauzerde dynç alyş ýatlatmalary, dem alyş maşklary we binaural (iki gürleýjiden gelýän) ritmleri diňlemek üçin funksiýalar ornaşdyrylan. Gapdal panelinde «Boosts» atly bölüm ýerleşýär. Bu bölümde diňlenilende adamlara dürli ýygylykdaky sesleri eşitdirýän sazlar, daşky gurşawyň sesleri we binaural ritmleriň utgaşmalary jemlenendir. Mundan başga-da dynç almak, ünsüňi jemlemek we beýleki maksatlar üçin ýörite ýazgylar bar. Şeýle-de, Opera Aria emeli aň kömekçisine hem-de WhatsApp we Messenger messenjerlerine gysga ýollaryň elýeterlidigi barada bellenip geçilýär.
Brauzerde «Take a break» (Dynç al) funksiýasy hem bar. Ol ulanyja wagtly-wagtynda dynç almalydygyny ýatladýar. Ulanyjy dynç alyş görnüşini özi saýlap bilýär. Mysal üçin, boýny hereketlendirmek üçin kamera arkaly ýörite maşklary ýerine ýetirmek mümkin. Bu maşklar ýerine ýetirilýän mahaly brauzer, maşklaryň dogry ýerine ýetirilmegini we dogry durşy saklamagy ýatladyp durýar. Şeýle-de, görkezmeleri seslendirmek üçin erkegiň ýa-da zenanyň sesini saýlamak mümkin.
Häzirki wagtda brauzer diňe iňlis dilini goldaýar, ýöne Opera geljekde beýleki dilleri hem goşmagy meýilleşdirýär.
Işläp düzüjiler, Opera Air-iň aýratyn önüm hökmünde döredilendigini we onuň beýleki Opera brauzerleri bilen birleşdirilmeýändigini aýratyn belläp geçýärler.
