Google öz Gemini akylly kömekçisini täzeläp, Android-iň gulplanan ekranynda Extensions goldawyny goşdy. Indi ulanyjylar ýumuşlary smartfony gulpdan açmak zerurlygy bolmazdan ýerine ýetirip biler diýip, Android Authority habar berýär.
Extensions funksiýasy Gemini kömekçisine Flights, Maps we Gmail ýaly Google hyzmatlaryndan hem-de beýleki programmalardan şahsylaşdyrylan maglumatlary almaga kömek edýär. Şonuň netijesinde ulanyjy el bilen gözlemek üçin wagt sarp etmän, soraglaryna çalt jogap alyp bilýär. Mysal üçin, dükanyň iş wagtyny bilmek, golaýdaky restorany tapmak ýa-da bron etmegiň ädimlerini görmek bolar.
Gulplanan ekranda Extensions-y işletmek üçin şu aşakdakylar zerur:
- Gemini sazlamalaryny açmaly.
- “Gulplanan ekranda Gemini” bölümine geçmeli.
- “Gemini-ni gulpdan açmazdan ulanmak” opsiýasyny işletmeli.
Şondan soň Gemini-ni “Hey Google” ses buýrugynyň kömegi ýa-da öçürmek-ýakmak düwmesini (Pixel ulanyjylary üçin) dowamly basmak bilen işjeňleşdirmek bolýar.
Google soraglaryň köpüsiniň gulpy açmazdan işlejekdigini, ýöne senenama wakalary ýa-da Gmail-iň mazmuny ýaly şahsy maglumatlara girmek üçin ulgamyň şahsyýeti tassyklamagy sorajakdygyny belleýär.
Diňe aýda 20 dollara Gemini Advanced ýazylyşygy bilen elýeterli bolan Gems ýa-da sesli çat ýaly beýleki funksiýalardan tapawutlylykda, gulplama ekranynda Extensions-y ulanmak mümkinçiligi Gemini-ni ulanyjylaryň hemmesi üçin açykdyr.
