Portugaliýanyň milli ýygyndysynyň kapitany we Saud Arabystanynyň «Al-Nasr» klubunyň hüjümçisi Kriştianu Ronaldu 5-nji fewralda 40 ýaş toýuny belledi.
Futbolçy bu şanly gününi maşgalasynyň we ýakyn dostlarynyň arasynda belläp geçirdi.
«Doglan günüm üçin aýdan ajaýyp gutlaglaryňyz üçin hemmäňize köp sag boluň! Maşgalam we dostlarym bilen ajaýyp gün geçirdik, mundan gowusyny arzuw edip hem bolmaz» diýip, portugaliýaly futbolçy X sosial torunda surat bilen bilelikde paýlaşdy.
Gutlagda düşürilen adaty toparlaýyn suratyň deregine, Ronaldunyň tortuň şemini üfleýän wideosy internetde meşhur boldy. Dünýä futbolunyň ýyldyzy muny üýtgeşik usulda ýerine ýetirdi. Ol tortuň daşyndan tans edip, şemleri üfläp öçürdi. Bu pursat arap we latyn sazlarynyň garyşyk görnüşindäki «Happy Birthday» aýdymy bilen utgaşdy.
Futbolçyny «Al-Nasr» kluby hem aýratyn gutlady. Onuň hormatyna Er-Riýaddaky ullakan LED ekranly sferiki binada animasiýa görkezildi. Ol ýerde Ronaldu, bütin karýerasy boýunça oýnan klublarynyň eşiklerinde şekillendirildi. Wideoşekilli gutlagda onuň meşhur gol hereketi görkezildi, onuň yz ýanyndan bolsa «Biz hem seniň bilen bilelikde gutlaýarys, CR7. Doglan günüň gutly bolsun! Saud Arabystany seni söýýär» diýen ýazgy peýda boldy.
Ronaldu öz professional karýerasynda «Sporting», «Mançester Ýunaýted», «Real», «Ýuwentus» we «Al-Nasr» klublarynda çykyş etdi. Ol umumylykda 923 gol geçirdi. Şolaryň 788-sini klub derejesinde, 135-sini bolsa Portugaliýanyň milli ýygyndysynyň düzüminde geçirdi.
Ronaldu bäş gezek «Altyn top» baýragyny aldy we şol sanda UEFA Çempionlar ligasynyň hem bäş gezek ýeňijisi boldy. Şeýle-de, ol üç gezek Angliýanyň, iki gezek Ispaniýanyň we iki gezek Italiýanyň çempiony boldy. 2016-njy ýylda bolsa Portugaliýanyň ýygyndysyna Ýewropanyň Çempionatynda ýeňiş gazandyrdy.
Ronaldunyň «Al-Nasr» bilen şertnamasy tomusda tamamlanýar. Mediýanyň maglumatlaryna görä, hüjümçi klub bilen täze ylalaşyk boýunça gepleşikleri geçirýär. Şeýle-de bu şertnama esasynda, onuň klubdan 5%-lik paýnama almagy hem mümkin.
