Hytaýyň Senagat we maglumat tehnologiýalary ministrliginiň maglumatlar bazasynda Xiaomi YU7 elektrikli krossoweri barada goşmaça maglumatlar peýda boldy. Maglumatlara görä, täze ulag bir gezeklik doly zarýady bilen esasy bäsdeşi bolan Tesla Model Y-den has köp ýol geçýär diýip, CarNewsChina habar berýär.
Bu ulag Xiaomi kompaniýasynyň täze awtoulag bölüminiň çykaran ikinji modeli bolup durýar.
Xiaomi YU7 220 kWt-lyk öň tarapky we 288 kWt-lyk yz tarapky elektrik hereketlendirijileri bilen üpjün edilendir. Olaryň jemi kuwwaty bolsa 691 at güýjüne deňdir.
Ministrligiň maglumatlaryna görä, Bu model CLTC standartlaryna laýyklykda 670, 750 we 760 kilometrlik üç dürli akkumulýator görnüşleri üçin sertifikatlaşdyryldy. Mysal üçin, ýakynda täzelenen Tesla Model Y 78,4 kWt-sagatlyk akkumulýatory we iki hereketlendirijili ulgamy bilen CLTC standarty boýunça 719 kilometre çenli ýol geçýär.
Şeýle-de, Xiaomi YU7-niň diňe yzky tekerlerden hereketlendirilýän, 320 at güýjüne barabar kuwwatly görnüşi hem bolar. Bu konfigurasiýada ulagyň iň ýokary tizligi 253 km/s-den 240 km/s-e çenli peseler.
Xiaomi YU7 elektrikli krossoweri 2025-nji ýylyň tomsunda – iýun ýa-da iýul aýlarynda Hytaýyň içerki bazaryna çykarylar. Öň berlen maglumatlara görä, bu krossoweriň başlangyç bahasy takmynan 250 müň ýuan (35 müň dollar) bolar.
