Beýik Britaniýada bulut hasaplamalary we emeli aň üçin Ýewropada iň uly maglumat merkezini gurmak taslamasy makullandy. DC01 kompaniýasy bu maglumat merkezini Angliýanyň günorta-gündogaryndaky Hartfordşir graflygynda gurar.
Täze maglumatlary işleýiş merkezi DC01UK-nyň meýdany iki million ineödürdül futa (takmynan, 185 806 inedördül metr) barabar bolup, milli elektrik ulgamyndan 400 MBA (megawolt-amper) elektrik energiýasyny sarp eder. Elektrik energiýasynyň bu mukdary 20 000 öýi üpjün etmek üçin ýeterlikdir.
Taslamanyň gurluşygynyň bahasy 3,75 mlrd funt sterling bolup, merkez ulanylyşa girizilenden soň işewürlik salgydy görnüşinde alynýan ýyllyk girdeji 21,4 mln funt sterling bolar. Maglumat merkezi gurluşyk wagty 500 hünärli iş ornuny, işe goýberilenden soň 200 hemişelik hünärli iş ornuny we goşmaça 13 740 iş ornuny döretmäge mümkinçilik berer.
Maglumat merkezi 85 akr meýdanda gurlar, bu meýdanyň 54%-i ýaşyl giňişlik bolup galar. Gurluşygy 2027-nji ýylda başlamak meýilleşdirilýär, ulanylyşa bolsa ýene üç ýyldan, 2030-njy ýylda giriziler.
Bu desganyň esasy kärendeçisi AWS, Microsoft ýa-da Google ýaly iň uly ulgam operatorlarynyň biri bolar diýip çaklanylýar.
