Pekindäki zawodyň çäginde üç sany elektrikli hereketlendirijisi bolan we iň ýokary güýji 1138 kWt-a (1526 at güýjüne) ýetýän örän güýçli we çalt Xiaomi SU7 Ultra sedanlary göründi diýip, CarNewsChina habar berýär.
Kompaniýa iň ýokary derejeli modelini köpçülikleýin önümçilige goýberdi. Onuň satuwynyň we müşderilere eltilmeginiň mart aýynda başlanmagyna garaşylýar.
Ýatlatsak, Xiaomi SU7 Ultra dünýäniň iň çalt dört gapyly awtoulagy bolupdy.
Deslapky sargytlar 29-njy oktýabrda başlady, bahasy bolsa 113 müň 200 dollar diýlip kesgitlenildi. Bu sedan ýokary bahasyna garamazdan, tanyşdyrylyş dabarasy tamamlanandan soň bary-ýogy 10 minudyň dowamynda 3680 sany sargyt aldy.
Xiaomi-niň Pekindäki zawodynda onlarça SU7 Ultra ulaglary görüldi. Sport görnüşli öňki bamperi, ulaldylan tormozlary, aýratyn sary reňkli kuzowy we «Ultra» ýazgylary bilen ak çyzyklar bu modeli beýlekilerden tapawutlandyrýar. Mundan başga-da Xiaomi SU7 Ultra ulaldylan yzky spoýleri we giňeldilen kuzowy bilen aýratyn tapawutlanýar.
Bu awtoulaglardan onlarçasynyň bardygy, bu sedanyň köpçülikleýin önümçilige girizilendigine şaýatlyk edýär. Şonuň ýaly-da, Xiaomi geçen ýylyň fewral aýynda adaty SU7 modelini köpçülikleýin önümçilige goýberipdi. Awtoulagyň hakyky satuwy bolsa 28-nji martda başlapdy.
