Iki ýyllap dowam eden pese gaçmadan soň bazar täzeden ösüş görkezdi. 2024-nji ýylda dünýä boýunça smartfonlaryň satuwy 5% ýokarlandy. Ortaça satuw bahasy bolsa rekord derejä – 365 dollara ýetdi diýip, Counterpoint ýazýar.
Smartfonlaryň satuwy diňe bir girdeji boýunça däl, eýsem sany boýunça hem artdy. Soňky iki ýylyň dowamynda ilkinji gezek şeýle ösüş boldy. Dünýäniň ykdysady ýagdaýy kadalaşdy. Adamlaryň täze telefon satyn almagy has ýygjamlaşdy. Munuň sebäbini 5G torlarynyň ýaýramagy, kameralaryň kämilleşmegi we prosessorlaryň tizlenmegi bilen baglanyşdyrýarlar.
2024-nji ýylda öndürijiler has gymmat smartfonlara üns berdiler, ulanyjylar hem ýokary derejeli enjamlary satyn almak islediler. Şol sebäpli smartfonlaryň ortaça bahasy ýokarlandy.
Apple kompaniýasynyň girdeji boýunça bazardaky paýy 46%, satuw sany boýunça bolsa 18% boldy. Girdeji boýunça Apple birinjiligi saklady. Satuw sany boýunça bolsa Samsung-yň yzynda galdy. Şeýle-de bolsa, Apple satuw bahasy boýunça täze rekordyny goýdy. Onuň ortaça satuw bahasy 900 dollar boldy.
Samsung bu görkeziji boýunça ep-esli yzda galdy. Ol 299 dollar ortaça satuw bahasy bilen ikinji orny eýeledi. Kompaniýanyň smartfon satuwy birneme azaldy, emma ortaça satuw bahasyny ýokarlandyrmak arkaly girdejisini 2% artdyrdy.
2024-nji ýylda satuw sany boýunça iň uly ösüşi Xiaomi görkezdi. Kompaniýa bazaryň 14%-ini eýeläp, üçünji orna çykdy. Şeýle-de Xiaomi awtomobil bazaryna girip, markasynyň abraýyny hasam ýokarlandyrdy.
Girdejisi iň çalt artan kompaniýa Vivo boldy. Onuň girdejisi 20% ýokarlandy. Hytaý we Hindistan bazarlarynda üstünlik gazanyp, 2024-nji ýylda şol ýurtlaryň her birinde bazar lideri boldy.
