Tesla kompaniýasynyň ýolbaşçysy Ilon Mask ýakynda geçirilen çärýeklik metbugat ýygnagynda şu ýyl kompaniýanyň 10 müň sany gumanoid (adam şekilli) Optimus robotyny öndürmäge taýyndygyny aýtdy diýip, Electrek neşiri habar berýär.
Mask bu maksadyň örän uly wezipedigini belledi. Optimus robotlary Tesla zawodlarynda işe ýerleşdiriler, olar önümçilige kömek ederler.
«Biz şu ýyl dekabryň ahyryna çenli 10 müň robot öndürip bilerismi? Ähtimal, ýok. Ýöne müňlerçesini öndürip bilerismi? Hawa, men muny başararys diýip pikir edýärin. Bu müňlerçe Optimus roboty ýylyň ahyryna çenli peýdaly işler ederlermi? Hawa, men olaryň peýdaly boljakdygyna ynanýaryn» diýip, Mask aýtdy.
Mundan ozal Tesla kompaniýasy käbir robotlaryň eýýämden zawodlarynda işleýändigini habar beripdi. Ýöne metbugat çärelerinde, görkezilen robotlaryň hakykatda uzakdan adamlar tarapyndan dolandyrylýandygy ýüze çykaryldy.
Maskyň sözlerine görä, häzirki wagtda Tesla her aý 1000 sany Optimus robotyny öndürmek üçin önümçilik hataryny gurýar. Soňraky önümçilik hatary her aý 10 müň robot çykarmaga mümkinçilik berer. Mundan başga-da, Tesla kompaniýasy Optimus-yň täze wersiýasynyň üstünde işleýär. Bu täze modelden her aý 100 müň sanysy öndürilip, onuň önümçilik hatary bolsa indiki ýyl işe giriziler.
Maskyň meýilnamalary has uly, ol her ýylda 100 million Optimus robotyny öndürmegi maksat edinýär. Onuň pikirine görä, bu kompaniýanyň esasy girdeji çeşmesine öwrüler.
Robotlaryň satuwyna 2026-njy ýylda başlanar. Şol wagta çenli Tesla ähli robotlary diňe öz işlerinde ulanmagy meýilleşdirýär. Önümçilik ýylda 1 million robota ýetende, bir robotyň bahasy 20 müň dollar ýa-da ondan hem arzan bolar. Bu bolsa takmynan 2027-nji ýylda bolup biler.
