Kataryň Ooredoo kompaniýasy Alcatel Submarine Networks (ASN) fransuz kompaniýasy bilen täze suwasty kabeli çekmek boýunça degişli ylalaşyga gol çekdi. Bu kabel sebitiň ýedi ýurduny: Katary, Omany, BAE-ni, Bahreýni, Saud Arabystanyny, Kuweýti we Eýrany birleşdirer diýip, Telecoms.com habar berýär.
«Fibre in Gulf» (FIG) atly taslama Pars aýlagynyň arap döwletleriniň hyzmatdaşlyk geňeşine (GCC) degişli ähli ýurtlara, olary Ýewropa bilen baglanyşdyrýan täze geçelgäni, ýagny internedi we maglumatlary geçirmek boýunça täze ýoly hödürleýär. Bu täze ýol has az gijikmeli, gysga we howpsuz bolar. Kabelde 24 sany optiki süýüm bolup, onuň maglumat geçiriş tizligi sekuntda 720 terabite çenli bolar.
Bu infrastruktura işewür müşderilere, hökümetlere, emeli aňly hyzmatlary üpjün edýän kompaniýalara, maglumat merkezlerine we telekommunikasiýa operatorlaryna uly mümkinçilikler döredip, toruň ygtybarlylygyny we howpsuzlygyny berkidip, internet baglanşygynyň tizligini hem ýokarlandyrar.
Ooredoo kompaniýasynyň maýa goýumlary, sebitleýin sanly senagatyň ösmegine uly itergi berer. Bu taslama, bulut hyzmatlarynyň ösüşini, uly maglumatlar inisiatiwalaryny we umumy sanly öwrülşigi tizleşdirer.
