YouTube döredijiler bilen muşdaklaryň arasyndaky aragatnaşygy güýçlendirmegiň ýollaryny giňeldýär. Indi wideo döredijileri Discord ýaly başga platformalara mätäç bolmazdan, öz sahypalarynda muşdaklary bilen pikir alşyp bilerler diýip, The Verge neşiri habar berýär.
Diňe mobil enjamlarda elýeterli bolan «Jemgyýetler» (Communities) aýratynlygy ilkinji gezek geçen güýz «Made for YouTube» çäresinde hödürlendi. Döredijiler bu ýerde tekstden we suratdan ybarat postlary paýlaşyp, muşdaklar bolsa teswir galdyryp, pikir alşyp bilýärler.
YouTube şu wagta çenli bu aýratynlygy az sanly dörediji bilen synagdan geçirdi. Netijeler gowy boldy, şonuň üçin hem indi bu mümkinçilik has köp döredijilere hödürlener.
Döredijiler YouTube Studio programmasynyň «Jemgyýet merkezinde» (Community Hub) öz kanallaryndaky hereketleri dolandyryp bilerler. Şeýle-de muşdaklara jogap bermek üçin teklipleri hödürläp bilerler.
YouTube öň bar bolan «Jemgyýet» sahypasyny «Postlar» diýip atlandyrar. Bu ýerde maksat, täze aýratynlyk bilen öňki aýratynlygyň arasyndaky tapawudy ulanyjylara has düşnükli etmekdir. Sahypanyň işleýşi öňküligine galdyrylar. Döredijiler bu ýerde täzelikleri paýlaşyp bilerler, şeýle-de tomaşaçylar hem öňküsi ýaly teswir galdyrmaga dowam edip bilerler.
