Microsoft kompaniýasynyň işläp düzüjileri Windows 11 operasion ulgamynyň dürli programmalarynda Copilot AI kömekçisini elýeterli etmek boýunça işlerini dowam etdirýär. Bu gezek Paint grafiki redaktorynda Copilot-y çalt açmak üçin ýörite düwme peýda boldy. Onuň kömegi bilen ulanyjylar Paint programmasynyň içinde bar bolan emeli aň esasly ähli mümkinçiliklere elýeterli bolarlar diýip, The Verge neşiri habar berýär.
Paint programmasynda Copilot düwmesine basylandan soň, generatiw algoritmlere esaslanýan Cocreator, Image Creator, Generative Erase we Remove Backogrund ýaly funksiýalar ýerleşdirilen kiçi menýu açylýar. Microsoft kompaniýasynyň Copilot düwmesini Paint programmasyna goşmagy, AI kömekçisini mümkin bolan her ýere, hatda klawiaturalardan başlap Windows-yň meseleler paneline çenli ornaşdyrmak isleginiň ýene bir ädimi boldy.
Microsoft ýakynda generatiw neýron torlaryna esaslanýan şekil döretmek funksiýalaryny Paint programmasyna goşdy. 2023-nji ýylyň ahyrynda Paint grafiki redaktorynda DALL-E algoritmine esaslanýan Cocreator funksiýasy peýda boldy. Soňra ýene-de işläp düzüjiler birnäçe goşmaça AI gurallaryny goşdular, indi bolsa Copilot düwmesiniň peýda bolmagy bilen olaryň hemmesi bir ýere jemlendi.
Bu täze aýratynlyk şu hepde paýlanylyp başlanan täzelenmäniň bir bölegi bolup, ol Windows Insider synag maksatnamasynyň Dev we Canary kanallaryndaky ulanyjylara elýeterli bolar. Täzelenme, şeýle hem AI gözleg funksiýasynyň gowulandyrylmagyny öz içine alýar. Indi ulanyjylar bu guraly bulut ýat hyzmatyndaky suratlary tebigy dil buýruklary arkaly gözlemek üçin ulanyp bilerler. Mundan öň bu mümkinçilik diňe ýerli faýllar bilen çäklenýärdi.
