Reddit platformasyndaky ZenonDesingk atly ulanyjy Samsung Galaxy Watch 5 akylly sagadynda PSP oýunlaryny sekuntda 60 kadr (FPS) tizlikde işletmegi we Steam Link arkaly kompýuter oýunlaryny striming etmegi başardy diýip, Android Authority habar berýär.
ZenonDesingk atly ulanyjy Google Play Store-däki Wear OS oýunlaryny kän bir halamady we has gowy oýunlary oýnamak isledi. Ýöne APK faýllaryny Bluetooth ýa-da brauzer arkaly göçürip almak işlemeýärdi. Şonuň üçin ol ADB (Android Debug Bridge) ulanmaga karar berdi. Bugjaeger atly programma arkaly telefonyndan akylly sagadyna Wi-Fi arkaly APK faýllaryny geçirdi.
Şeýlelikde, ol PSP emulýatoryny akylly sagadyna üstünlikli gurnady. DPI sazlamalaryny üýtgedip, oýunlary oýnalyp bilner ýaly ýagdaýa getirdi. Netijesimi? Geň galdyryjy boldy: ol Galaxy Watch 5 akylly sagadynda GTA: Vice City, Mortal Kombat we Need for Speed: Most Wanted ýaly klassikalary sekuntda 60 kadra çenli tizlikde işletmegi başardy. Has agyr oýunlar bolsa, meselem, God of War sekuntda 30 kadr tizlikde açyldy.
Emma ZenonDesingk munuň bilen hem çäklenmedi. Ol synaglaryny dowam etdirip, sagadyna Steam Link gurnady we Forza Horizon 4 ýaly uly göwrümli kompýuter oýunlaryny göni «bileginde» striming etdi. Elbetde, sagadyň kiçi ekrany oýny oýnamagy kynlaşdyrýardy, şonuň üçin ol Bluetooth oýun dolandyryjysyny ulanyp, tejribäni has amatly hala getirdi.
Elbetde, bu oýun oýnamak üçin iň amatly usul däl. Ýöne bu synag häzirki zaman enjamlaryň öňki tehnologiýalara garanyňda näderejede güýçlüdigini, azajyk bilim we döredijilik bilen näderejede köp zat edip bolýandygyny görkezýär.
