Google 2024-nji ýylda howpsuzlyk syýasatynyň bozulandygy üçin Google Play-de 2,36 milliondan gowrak Android programmasyny petikledi. Bu soňky ýyllarda rekord görkeziji boldy.
Deňeşdirmek üçin, 2023-nji ýylda 2,28 mln, 2022-nji ýylda 1,5 mln programma petiklendi.
Şeýle-de, kompaniýa zyýanly programma üpjünçiligini, şol sanda internetde ulanyjynyň hereketini yzarlaýan programmalary ýerleşdirmäge synanyşan 158 müň işläp düzüji akkaunty üçin platforma elýeterliligi çäklendirdi. Bir ýyl ozal görkeziji 333 müň, 2022-nji ýylda 173 müň bolupdy.
Blokirlemeleriň sanynyň artmagy zyýanly programmalary gözlemekde emeli aňyň ulanylmagy bilen baglanyşdyrylýar.
“Häzirki günde biziň zyýanly programmalar üçin synlarymyzyň 92%-den gowragy emeli aňyň kömegi bilen geçirilýär” – diýip, Google belledi.
Şeýle-de, kompaniýa programmalaryň artykmaç ygtyýarnama almagynyň 1,3 mln ýagdaýynyň öňüni aldy. Google Play Protect hatda Google Play-den daşary gurnalan programmalary goramak üçin täzelenme aldy.
Programmalary işläp düzüjiler hem öz programmalaryny zyýanly SDK-dan we bikanun ulanylyş ýagdaýlaryndan has gowy goramak üçin täze gurallary aldy. API Play Integrity-nyň has giňden ornaşdyrylmagy ygtybarsyz çeşmelerden düzgün bozmalaryň 80% azalmagyna getirdi. Indi programma gurnamalarynyň 91%-i howpsuzlyk funksiýalaryny we gizlinlik goragyny ulanýar, bu operasion ulgamyň Android 13 we has giçki wersiýalarynda elýeterlidir.
2024-nji ýylda Google ygtybarsyz APK-ny blokirlemegiň synag ulgamyny 10 ýurda çenli giňeltdi. Bu 200 müň zyýanly programmany gurnamak üçin 36 mln synanyşygyň öňüni almaga mümkinçilik berdi.
