Emeli aňyň esasynda tehnologiýa pudagynyň ösmegi haýran galdyryjy mümkinçilikleri hödürleýän köp sanly täze hyzmatlaryň we programmalaryň döremegine getirdi. Ykjam segmentde Google bilen Samsung bu tehnologiýany çalt ornaşdyrmakda öňdebaryjy boldy.
Täze hasabata görä, emeli aňy ulanýan programmalar hem, öz gezeginde, sarp edijileriň bu programmalar üçin harçlamalarynyň artmagyna getirdi. 2024-nji ýylda sarp edijiler surat we wideo redaktorlaryny öz içine alýan bu programmalar üçin 1 mlrd dollar sarp etdi. Programmalaryň köpüsi bary-ýogy birnäçe gezek basmak bilen çylşyrymly üýtgeşmeleri girizmäge mümkinçilik berse-de, aglabasy çäkli mugt synag wersiýalaryny hödürleýär. Çägi ulaltmak bolsa ulanyjylardan töleg talap edýär.
Sensor Tower kompaniýasynyň hasabatyna görä, 2024-nji ýylda emeli aň funksiýalary umumy programmalar üçin çykdajylary 150 mlrd dollara çenli ýokarlandyrmaga ýardam etdi. Bu ondan öňki ýyl bilen deňeşdirilende 13% köpdür. ChatGPT, Gemini we Doubao ýaly EA programmalary bir ýylda sarp ediji çykdajylaryny 200% artdyrdy.
2024-nji ýylda sarp edijiler EA programmalaryny tas 7,7 mlrd sagat ulandy, şeýle programmalar, takmynan, 17 mlrd gezek ýüklendi. Şeýle depgin bilen EA programmalary sarp edijileriň ýyllyk çykdajylary boýunça ilkinji onluga-da çalt girip biler.
Mysal üçin, ChatGPT-niň aýda 50 mln işjeň ulanyjysy bar. Ol şeýle görkezijä Temu, Disney+ ýa-da YouTube Music ýaly programmalardan hem çalt ýetmegi başardy.
