Dünýäde iň uly A23a aýsbergi Günorta Atlantika ummanyndaky Günorta Georgiýa britan adasynyň deňinden geçip gider. Arktika we Antarktika barlag institutynyň (AABI) alymlary ada tarap hereket eden aýsbergiň hereketiniň ugruny üýtgedendigini habar berdiler.
Kosmosdan alnan suratlar ullakan buz böleginiň günbatar tarapa gapdala çekilendigini we kenardan 300 km sowlup geçjekdigini tassyklady.
Günorta Georgiýa adasynyň töweregine “aýsbergler seýilgähi” diýilýär, sebäbi Antarktidadan bölünip aýrylýan aýsbergler köplenç şol ýere ýüzüp barýar. 2025-nji ýylyň başynda A23a hakykatdanam ada tarap hereket edýärdi. Aýsbergiň mundan beýläkki ýoly ýele we akyma bagly bolar, ýöne çaknyşmak ähtimallygy ýok.
Göwrüminiň äpetdigine garamazdan (meýdany Londonyň takmynan iki essesi, agramy trillion tonna töweregi), A23a 2023-nji ýylyň noýabr aýyndan bäri eremegini dowam edýändigi sebäpli meýdanynyň 9% töweregini ýitirdi. Ýüzüşiniň başyndan bäri 1400 kilometr töweregi ýol geçdi. Aýsberg buzlukdan 1986-njy ýylda bölüniň aýryldy we uzak wagtlap ýalpaklykda saklanyp ýatandan soň, 2023-nji ýylyň iýulynda hereket edip başlady.
Alymlar A23a-nyň diýseň berkdigini, formasynyň çalt bölünmegine ýol bermeýändigini bellediler. Aýsbergiň göwrümi kiçelýän hem bolsa, ol gurluşyny saklap galýar. Hünärmenleriň pikirine görä, A23a-nyň buzlukdan bölünip aýrylmagy global ýylylygyň netijesi däl-de, tebigy prosesdir.
