Samsung kompaniýasy Galaxy A smartfonlarynyň hataryny giňeltmegini dowam edýär. Flagman Galaxy S25 hataryny çykarandan soň, brend indi Galaxy A56 5G modeli bilen dünýä bazarlaryna çykmaga taýýarlanýar. ABŞ-nyň aragatnaşyk boýunça Federal komissiýasynyň (FCC) sertifikasiýasy bu täze enjamyň möhüm häsiýetnamalaryny tassyklaýar. Bu bolsa onuň tiz wagtda satuwa çykaryljakdygyny görkezýär diýip, Gizmochina habar berýär.
Galaxy A56 5G modeli SM-A566E/DS belgisi bilen hasaba alnan. Bu enjam GSM, WCDMA, LTE FDD we 5G ýaly aragatnaşyk tehnologiýalaryny goldaýar. Mundan başga-da, Bluetooth, NFC, GNSS we Wi-Fi (802.11 b/g/n/a/ac/ax) ýaly tehnologiýalar bilen hem enjamlaşdyrylan.
Smartfonyň batareýasy 4905 mAh kuwwatly bolup, ol 45 Wt çalt zarýad almagy goldaýar. Şeýle-de bolsa, FCC-niň synaglarynda 25 Wt zarýad adapteri ulanylypdyr. Enjam Exynos 1580 prosessory esasynda işleýär we 8/128 GB hem-de 12/256 GB ýat konfigurasiýalarynda hödürlenýär. Operasion ulgamy bolsa, emeli aňa esaslanan täze funksiýalary öz içine alýan One UI 7.0 interfeýsi bilen Android 15-dir.
Galaxy A56 5G modeli mundan öň hem Geekbench-de geçirilen bir synagda görlüpdi. Synagyň netijelerinde, smartfon ýokary öndürijiligini görkezipdi.
