21-nji ýanwarda SpaceX Starlink hemralaryny Falcon 9 raketasy arkaly Ýere golaý pes orbita uçurdy. Takmynan 8 minutdan soň raketanyň birinji basgançagy şowly ýagdaýda Ýere dolanyp geldi we Atlantik ummanynda ýerleşýän ýüzýän platformasynyň üstüne gondy. Şeýlelikde, SpaceX Falcon raketasynyň birinji basgançagyny 400-nji gezek üstünlikli yzyna gondurmagy başardy diýip, Space.com habar berýär.
Bu üstünlikleriň esasy bölegi SpaceX-iň esasy «işçi aty» hasaplanýan Falcon 9 raketasyna degişlidir. Kompaniýa bu tizlendirijileri yzygiderli gaýtadan ulanýar. Hatda Falcon 9 raketasynyň birinji basgançaklarynyň biri rekord goýup, 25 gezek uçurylyp, yzyna gondurylypdy.
Käbir gonuşlar bosa Falcon Heavy raketasynyň basgançaklary arkaly amala aşyryldy. Falcon Heavy raketasynda Falcon 9 raketasynyň üç sany tizlendirijisi ýerleşýär.
Bu 400 üstünlikli gonduryşlara, SpaceX-iň Aý we Mars saparlary üçin işläp düzýän Starship kosmos gämisiniň gonuşlary degişli däldir.
Uzynlygy 123 metr bolan Starship kosmos gämisi, eýýäm 7 synag uçuşyny amala aşyrdy. Şeýle uçuşlaryň iň soňkusy 16-njy ýanwarda bolup geçdi. SpaceX-iň Super Heavy atly birinji basgançagy başlangyç meýdançasyna dolanyp gelip, Mechazilla diňiniň «penjelerine» tutunmagy başarypdy. Bu Super Heavy üçin ikinji üstünlikli gonuş bolup, ilkinjisi geçen ýylyň noýabr aýynda amala aşyrylypdy.
