Angliýanyň “Mançester Siti” kluby “Aýntrahtdan” (Frankfurt, Germaniýa) müsürli hüjümçi Omar Marmuşyň geçendigini mälim etdi. Bu barada habar iňlis klubunyň resmi saýtynda peýda boldy.
“Mançester Siti” Frankfurtyň “Aýntraht” klubundan Omar Marmuş bilen şertnama baglaşylandygyny habar bermäge şat. 25 ýaşly müsürli hüjümçi “Etihada” dört ýarym ýyllyk şertnama boýunça geçdi, bu onuň 2029-njy ýylyň tomsuna çenli klubda galjakdygyny aňladýar.
Marmuş – Ýewropa futbolynda iň köp isleg bildirilýän ýaş hüjümçileriň biri, ol hüjümiň islendik tarapynda oýnamaga ukyply” – diýlip, klubuň beýanynda aýdylýar.
Şol bir wagtyň özünde, “Sitiniň” goragçysy Kaýl Uokeriň kärendesine hökmünde Italiýanyň “Milan” toparyna geçjekdigi belli boldy. Insaýder Fabrisio Romanonyň maglumatlaryna görä, şertnamada 5 mln ýewro satyn almak mümkinçiligi hem göz öňünde tutulýar. Futbolçynyň zähmet hakyny italýan kluby tölär.
34 ýaşly Uoker 2017-nji ýyldan bäri “Mançester Sitide” çykyş edýär. Bu döwürde ol 319 oýna gatnaşyp, 6 gol geçirdi we 23 netijeli geçirim etdi. Klub bilen bilelikde Angliýanyň alty gezek çempiony we Çempionlar ligasynyň, UEFA-nyň Superkubogynyň we Klublaýyn dünýä çempionatynyň ýeňijisi boldy.
