Ýewropanyň kosmos agentligi (ESA) Wengriýanyň Puli Space Technologies kompaniýasy bilen Aý baradaky maglumatlary satyn almak üçin ilkinji şertnamany baglanyşdy. Ylmy gözlegler Aýyň günorta polýusyndaky suw buzlaryna gönükdiriler.
Kompaniýa PLWS (Puli Lunar Water Snooper) spektrometriniň kömegi bilen maglumatlary ýygnar. Bu enjam Aýyň günorta polýar sebitindäki suw buzunyň ýataklaryny öwrenmek üçin niýetlenendir.
PLWS amerikan kompaniýasy Intuitive Machines tarapyndan işlenip taýýarlanan Micro Nova Hopper dronyna oturdylar. Dron Aýyň üstünden hereket edip, suw buzunyň bolup biljek kraterlerini we wodorodyň barlygyny öwrener. Intuitive Machines üçin ikinji boljak missiýany 2025-nji ýylyň fewral aýynda uçurmak meýilleşdirilýär.
ESA bu maglumatlary suw buzuny kisloroda, suwa we ýangyja öwürmek mümkinçiligini seljermek üçin ulanmagy meýilleşdirýär. ISRU hökmünde belli bolan bu tehnologiýa Aýda uzak missiýalara we kosmosy mundan beýläkki öwrenmek işlerine ýol açar.
Puli Space bilen şertnama uzak kosmosy özleşdirmek ugrunda döwlet we hususy guramalaryň arasynda hyzmatdaşlygyň möhümdigini görkezýär. ESA maglumatlary köpçülikleýin ýaýratmazdan öň olary seljermek üçin ylmy topar döretmegi hem göz öňünde tutýar.
