Meta kompaniýasy dakylýan enjamlar ugruny ösdürmegini dowam edýär. Kompaniýa türgenler üçin niýetlenen “Oakley” nyşanly täze akylly äýneginiň, sagatlaryň, şeýle-de kamera bilen enjamlaşdyrylan nauşnigiň üstünde işleýär diýip, Bloomberg neşiri habar berýär.
Meta sport bilen meşgullanýanlar üçin niýetlenen, ýokary derejeli displeýler bilen üpjün edilen Oakley nyşanly akylly äýnekleriň önümçiligine 2025-nji ýylda başlamagy meýilleşdirýär. Şeýle-de, ilkinji giňeldilen hakykat (AR) önümini 2027-nji ýylda hödürlemek maksady bilen taýýarlyklaryna dowam edýär.
“Täze önümleri işläp düzmekdäki işjeňliliginiň ýokarlanmagy, Meta-nyň özüni AI ugrundaky innowasion kompaniýa hökmünde ornaşdyrmak strategiýasynyň bir bölegidir” diýip, Bloomberg neşiri belleýär.
Kompaniýa täzelenen Ray-Ban modellerininiň satuwyny has-da giňeltmegi, şol sanda bu modellerde peýdalanylan tehnologiýany “Oakley” brendiniň täze modellerine uýgunlaşdyrmagy meýilleşdirýär.
Şeýle-de kompaniýa Hypernova atly täze modelini 2025-nji ýylda satuwa çykarmagy meýilleşdirýär. Täze model sag tarapdaky linzasynda displeýi bolan täsin gurluşy bilen hödürlener. Bu displeý, bildirişleri we suratlary görmek, şeýle-de ýönekeý programmalary dolandyrmak ýaly mümkinçilikleri hödürlär.
Bulardan başga-da Meta, Apple bilen bäsleşmek üçin täze akylly sagatlary we nauşnikleri döretmegi maksat edinýär. Kompaniýa AirPods nauşniklere bäsdeş boljak, emeli aň arkaly daş-töweregi analiz edip bilýän, “Camera Buds” atly kameraly nauşnikleriň üstünde işleýär.
Meta kompaniýasy wirtual we artdyrylan hakykat (VR we AR) tehnologiýalaryna birnäçe ýyl bäri onlarça milliard dollar maýa goýsa-da, häzirki wagta çenli hem giňden ýaýran üstünlik gazanyp bilmedi.
