Günde köp mukdarda massanyň zyňylmagy bilen utgaşýan 3.4 derejeli alawlama bolup geçdi. Netijede, 24-nji ýanwarda Ýerde G2 derejeli magnit hadysalarynyň bolmagyna garaşylýar. Bu barada Kosmos barlaglary institutynyň Gün astronomiýasy barlaghanasynyň we Russiýanyň Ylymlar akademiýasynyň Sibir bölüminiň Gün-Ýer fizika institutynyň (IKI we ISZF RAN) web sahypasynda habar berildi.
21-nji ýanwarda Günde bolup geçen alawlama Gün massasynyň zyňylmagy bilen utgaşdy. Zyňylma Gün diskiniň merkezinde diýen ýaly, ýagny Ýere iň ýokary täsir ediş zolagynda ýüze çykdy.
IKI we ISZF RAN-nyň hünärmenleriniň berýän maglumatlaryna görä, alawdan başga-da, plazma buludyna madda goşýan köp bolmadyk mukdardaky protuberanes gazy hem zyňyldy. Tizligiň (takmynan, 500 km/s) pesdigi sebäpli, Gün maddasynyň Ýere anna güni agşam gelmegine garaşylýar.
Tupanyň agşam gelýändigi sebäpli polýar şapagynyň görünmek ähtimallygy ýokary. Magnit hadysasy boýunça çaklamalar ýakyn günlerde anyklanar.
Häzirki çaklamalara görä, 24-nji ýanwarda anna güni magnit tupanlarynyň ähtimallygy 41%, geomagnit bozulmalarynyň ähtimallygy 35%.
Magnit hadysalarynyň güýji bäş bally şkala bilen bahalandyrylýar. G1 derejeli tupanlar iň gowşak hasaplanýar. Tupanlaryň iň ýokary derejesi G5 bolup, elektrik energiýasy ulgamynda çynlakaý kynçylyklary, hemra we radio aragatnaşygynyň işleýşinde düýpli bökdençlikleri döredip biler.
