Hytaýyň Söwda ministrligi köne awtoulaglaryň eýelerine täzesini satyn alanda arzanladyş almaga mümkinçilik berýän maksatnamany (Trade-in) işe girizdi. Bu barada Reuters gullugy habar berdi.
Bu çäre awtoulag satuwyny ýokarlandyrmaga kömek eden geçen ýylky başlangyjy ösdürmekdir.
Trade-in maksatnamasy diňe bir awtoulag satuwyny goldamak bilen çäklenmän, umuman, ykdysady ösüşi höweslendirmegi hem göz öňünde tutup döredildi.
Hytaýyň Döwlet statistika müdirliginiň maglumatlaryna görä, 2024-nji ýylda hojalyk tehnikalarynyň, şeýle hem ses we wideo enjamlarynyň bölek satuwy agzalan maksatnamanyň çäklerinde 1,03 trillion ýuana (takmynan, 143,29 milliard dollar) ýetdi. Bu görkeziji ilkinji gezek 1 trillion ýuandan geçdi we geçen ýyl 12,3% ösüşi görkezdi.
Söwda ministrligi tutuş ýurt boýunça 37 milliondan gowrak sarp edijiniň köne zatlaryny tabşyryp, täze hojalyk harytlaryny satyn almak üçin subsidiýalardan peýdalanandygyny habar berdi.
Maksatnamany giňeltmek boýunça soňky tagallalarynyň çäklerinde hökümet subsidiýa çalşyp boljak öý enjamlarynyň kategoriýalarynyň sanyny 2024-nji ýylda 8 bolanlygyndan 2025-nji ýylda 12-ä çenli köpeltmek kararyna geldi. Trade-in-e gatnaşýan önümleriň sanawyna mikrotolkunly peçler, suw arassalaýjy enjamlar, gap-gaç ýuwýan maşynlar we tüwi bişirijiler goşuldy.
